جؤوهر پوشیده میز آیینه باغرین آب ائدر

نئی کیمی کرداریمیز بندینده دیر گفتاریمیز،
قوللوغا بئل باغلاماق دیر قؤولوموز، اقراریمیز.
ای طبیب خیرده بین، گر دردیمیز چوخدور، ولی،
اهل حالیز، بیر اشارت دیر بیزیم گفتاریمیز.
تؤکمه نیز اوز سویونو دونیا و مافیها اوچون،
سکّه میز واردیر اگر، یوخدور بیزیم دیناریمیز.
گنج باد-آور کیمی، ای نئی، بو ویران دهرده،
گرچی بی مقداریق، آمما حاق بیلیر مقداریمیز.
گرچی یوخدور نالۀ مستانه میز بولبول کیمی،
بیز خرابت اهلی ییک، اولماز بیزیم هوشیاریمیز.
انتظار بی مروت ائتدی ویران صبر ائوین،
بیلمنم نئچین اونوتموشدور بیزی معماریمیز.
رنگ زردی، اشک سرخی بیزدن آل بینا ایسن،
امتحان لازیم دئییل، چون آری دیر دیناریمیز.
جؤوهر پوشیده میز آیینه باغرین آب ائدر،
چهره دن قؤوسی بیزیم آریتسالار جنگاریمیز.