سؤیله قؤوسی کیم، نه وئردین آلا بیلمزسن اونا؟

لعل نابین بیلمنم روح روان دیر، یا ندیر؟
سرو قددین مدّ عؤمر جاویدان دیر، یا ندیر؟
بیلمنم، ای سبز ته گولگون منه منظور اولان،
قاش و گؤزدور، یا لب شکّرفشان دیر، یا ندیر؟
خلق دئرلر وار دهان ایله میانین، سؤیله کیم،
اصلی واردیر، دوغرومو سؤزدور، یالان دیر، یا ندیر؟
پیچ و تابه بیر نهانی نوکته سالمیش عالمی،
هیچ کیم بیلمز کیم اول، موی میان دیر، یا ندیر؟
باغریمی بیر کان ائدن واردیر، دئییل معلوم کیم،
سن اؤزونسن، یا سؤزون دور، یا دهان دیر، یا ندیر؟
وار بیر بیداد ائدن عشاقه، آمما بیلمنم،
بخت دیر، یا چرخ، یا دؤور زمان دیر، یا ندیر؟
مور تک هرچند اؤلدورمک منی آسان اولور،
آخیر ای بیدادگر اول دخی قان دیر، یا ندیر؟
کئچدی عؤمروم بو چمنده آچمادیم گؤز تا بیلم –
کیم باهار ایامی، یا فصل خزان دیر، یا ندیر؟
یاخشیلار بیرله یامان باش لارسان ای ناز آفرین،
هئچ دئمزسن کیم، بو یاخشی دیر، یامان دیر، یا ندیر؟
سؤیله قؤوسی کیم، نه وئردین آلا بیلمزسن اونا؟
سنه دن اول بی باک آلان بیر نقد جان دیر، یا ندیر؟