منو
میلّتیم
نیه بو گۆنه دۆشدون
آی منیم مملکتیم؟
اؤزومه دۆشمن اولوب
آشیب-داشان ثروتیم.
بیر واخت سن ده خان ایدین،
واختا حؤکموران ایدین،
دؤولتلر قوران ایدین،
ایندی سنه نه اولدو
آ قوللاشان میلّتیم؟
داشیندان دا زر بیتر،
یئددی آرخانا یئتر.
دیلنچیدن بئشبئتر
یوخسوللاشان میلّتیم.
ناموسویلا، آرییلا،
کئچدیگی یوللارییلا،
بؤیوک اوغوللارییلا
اوغوللاشان میلّتیم.
ساواش هۆنرلرییله،
قهرمان ارلرییله،
بؤیوک ظفرلرییله
ناغیللاشان میلّتیم.
دمیر قؽران دیشییله،
ایگیدلیک وردیشییله،
اؤز شانلی کئچمیشییله
"ساغوللاشان" میلّتیم.
بو خالقین اؤز اؤولادی
اؤز-اؤزونو اوولادی.
صبرینی بوخوولادی
صبری داشان میلّتیم.
نئجه دؤزدون بیر بئله
مۆصیبته، مۆشکوله؟
چکدیگی سیتم ایله
آ یوللاشان میلّتیم؟
نه گۆنده‌سن، نه گۆنده؟
قور قالماییب کۆلونده.
غئیرتسیزلر الینده
بو گۆن چاشان میلّتیم.
ایسته‌ییرم چاشمایا،
دردییله یوللاشمایا،
بیر داها قوللاشمایا
خان اوغلو، خان میلّتیم.