دمیر کیمی کلمهلردیر منیم سلاحیم،
شعرلردیر، نغمهلردیر منیم سلاحیم!
واخت اولور کی، گؤزوم دۆزو دۆز گؤرمینده،
منه چوخدان تانیش اۆزو دۆز گؤرمینده،
یولومداکی چؤل-دۆزو دۆز گؤرمینده،
گؤزومه ده مبارزه اعلان ائتمیشم،
اؤزومه ده مبارزه اعلان ائتمیشم!
لووغالارا، ساتقینلارا، رۆشوتبازلارا،
اؤزلرینی سئون آرسیز شؤهرتبازلارا،
ملّتینی تانیمایان میللتبازلارا
هر سؤزومله مبارزه اعلان ائتمیشم،
ار سؤزومله مبارزه اعلان ائتمیشم!
آزادلیغا اؤلوم حکمو یازان کسلره،
ملّتلرین دوستلوغونو پوزان کسلره،
حاق یولوندان، دۆز یولوندان آزان کسلره
سؤز اوردوملا مبارزه اعلان ائتمیشم،
اؤز اوردوملا مبارزه اعلان ائتمیشم!
آغ گۆنومو قارا گؤرن جاهانگیرلره،
جینایتله عؤمور سۆرن جاهانگیرلره،
اؤلوملره رواج وئرن جاهانگیرلره
اؤز سازیملا مبارزه اعلان ائتمیشم.
هر یازیملا مبارزه اعلان ائتمیشم!
باشقاسینین تورپاغینا گؤز دیکنلره،
وطنیندن اوزاقلاردا قان تؤکنلره،
تاریخ بویو سینهلره داغ چکنلره
هر کلممله مبارزه اعلان ائتمیشم،
هر نغممله مبارزه اعلان ائتمیشم!
هاردا اولسا دردلییه شاد سؤیلینلره،
آددیمباشی حاقلییا یاد سؤیلینلره،
گۆنه، آیا گؤرونمه، بات سؤیلینلره
آمالیملا مبارزه اعلان ائتمیشم،
جلالیملا مبارزه اعلان ائتمیشم!
یئرده-گؤیده محاربه عاشقلرینه،
بیزه قارشی غفیل ضربه عاشقلرینه
قان پۆسکورن بو دبدبه عاشقلرینه
من آمانسیز مبارزه اعلان ائتمیشم،
صلحچون قانسیز مبارزه اعلان ائتمیشم!