منو
ماشاالله، قادر الله...
ماشاالله، قادر الله
گؤر نئجه دیلبر یارادیب!
گۆل اۆزون‌ده افشان-افشان
زۆلفی-معنبر یارادیب.
آغزی قؤنچه، لبی پۆسته،
بئلی اینجه، بویو بسته،
تؤکولوب‌دور دسته-دسته
نه گؤزل تئللر یارادیب!
قاشی فتنه، گؤزو جادو،
اۆزو لاله، خالی هیندو،
مینا گردن، ساچی قارقو،
گۆل بوخاغین تر یارادیب.
گۆن‌دن گؤیچک‌دیر جامالی،
سروی بنزر قددی-دالی،
لبین امن نئینر بالی؟
سؤزونو شککر یارادیب.
دیلی آلماس، دیشی اینجی،
آغ سینه‌سی گؤوهر گنجی،
وصفه گلمز نازو غنجی،
بونو افسونگر یارادیب.
مۆسلمانلار، بیر پریزاد
منی ائتدی یاخشی فرهاد،
غمزه‌سی بیر یاغی جلّاد،
کیپریین خنجر یارادیب.
هر کیمی خالقی-داور
بیر امره ائدیب موقر،
اونو بیر شوخی-گۆل-پیکر،
منی سمندر یارادیب.
او گۆن کی، یاران‌دی اینسان،
قلم یازدی بئله فرمان:
سنی بیر شاهی-گۆل روخان،
منی قلندر یارادیب.
ائدیب‌دیر صانعی-داور
هر کیمی بیر شاهه چاکر،
منی بیر دیوانه-ی-مهتر،
سنی بیر سرور یارادیب.
ازل‌دن قادری-بیچون
اؤزو قویموش بئله قانون.
سنی بیر دؤولت‌لی قارون.
منی بی مضطر یارادیب.
نه قؽلیم، نئیلییم، یارب،
دولموشام غم‌دن لبالب،
سنی بیر شاهی-مودب،
منی بیر مسخر یارادیب.
او دم کی، ربی-الاعلا
عالمی ائتدی هویدا،
سنی بیر شاهی-لافتا،
منی بیر قنبر یارادیب.
؟
بیر طرزینن ائدیب پیدا،
سنی بیر مهری-مجلا،
منی بیر اخکر یارادیب.
گۆل-روخساری نئینر غازه،
گل بیرجه سئیر ائیله نازه،
بولبول، چوخ گؤز دیکمه یازه،
گؤر نه گۆل پئیکر یارادیب.
نباتی، چک علی، علی،
کؤنلون اولسون جلی، جلی،
اونو الله، بلی، بلی،
بو دیل‌ده ازبر یارادیب.