گۆن یئتدی زواله، دؤندو آخشامه

گۆن یئتدی زواله، دؤندو آخشامه،
یاندی پرواننین چؽراغی گئنه.
دئگینن ساقییه دۆشسون دورانه،
گردیشه گتیرسین ایاغی گئنه.

نه مدت‌دیر خبریم یوخ او قؽزدان،
نئچه ایلدیر آیاق چکیبدیر بیزدن،
بو ساعت‌ده اونو ایسترم سیزدن،
گؤرون هاردا گلیر سوراغی گئنه.

جلّادی-جانسیتان سوسویوب قانه،
خدنگی-زرنیشان قویوب کمانه،
الین‌ده جامی-مئی گلدی مستانه،
قانیمی تؤکمه‌یه او یاغی گئنه.

منی گؤرجک اۆزه توتدون نقابی،
بهانه ائیلدین شرم و حجابی.
سن‌ده یوخ‌دور مگر وفا کیتابی،
گؤزوم‌دن آچمیسان بولاغی گئنه.

دئمدیم، سیررینی دئمه اغیاره،
سنی من‌دن جدا قؽلار، نه چاره،
ایندی کی، هجر اودو چکدی شراره،
قویما سن گۆلشنه او زاغی گئنه.

عشقین‌دن اریدیم، دؤندوم هیلاله،
گۆنوم باشا گلدی، یئتدیم زواله،
بیر نظر قؽل، گؤر دۆشموشم نه حاله.
هاچانا دین گزیم بو داغی گئنه!

نباتی، ناله‌دن اثر اولمادی،
گؤردویون ایشیق‌دان شر اولمادی،
بو شجردن سنه ثمر اولمادی،
دور، بیر ده گزگینن بو باغی گئنه.