ساقی، نه یاتمیسان، دور آیاغه، دور،
قویما قضا قالسین هنگامی-طرب.
خورشیدی-خاوری بۆرجی-هوتدن
سئیر اۆچون همهلی ائتدی منتخب.
هر گۆن اؤز یارینی چکیب آغوشا،
بۆلبوللر مست اولوب گلیب خۆروشا،
یاتما، یاتما، آییل، سن ده گل هوشا،
گؤتور پیالنی، دولدور لبالب.
دولاندیر باشینا جامی-گۆلگونو،
صدایه چولقاشدیر دشتو هامونو.
گتیر یادا فرهاد ایله مجنونو،
ناله چک، دئگیلن ال’عفو اۆللالب.
دورما کی، دۆنیانین یوخ اعتباری،
غنیمت بیلگینن بئش گۆن باهاری.
اؤزونه همدم قؽل بیر گۆل عذاری،
بیر چمن کۆنجونده هر روز تا شب.
میدانی-عشق ایچره سییرتدیم آتی،
مسخّر ائیلدیم رومو هئراتی.
محترم اوغلویام، آدیم نباتی،
ذاتیمیز هاشیمی، اصلیمیز عرب.