خوار اولما، دئدی!

او وفاسیز، ((منه بوندا سونرا یار اولما))، دئدی
سئومه هر بیر گؤزلی، عاشیقِ زار اولما، دئدی
بیر گؤزل عشقینه وئر کؤنلونو، ثابت قدم اول
جوشما دریا کیمی، خزری(١)، گیلاوار(٢) اولما، دئدی
بو قارا زولفده یوزلرجه اسیریم واردیر
احتیاط ائیله، بو زنجیره دوچار اولما، دئدی
چکمه، گؤز یاشی تؤ کوب گوزلریمین حسرتینی
گئجه، گوندوز بو خیال ایله خومار اولما، دئدی
سنی من سئومیرم، آردیمجا دوشوب یالوارما
ائل ایچنده دوشون اؤز قدرینی، خوار اولما، دئدی
وئرمرم اذن، سرِ کویوما جنّت دئیه سن
بوش تمنا ایله بی صبر و قرار اولما، دئدی
عکسِ روخساریما عالم اولوب حئیران، شاعیر
سن بو آیینه یه چوخ باخما، غبار اولما، دئدی
واحدم، من دئدیم، ای گول، قوجالیق دؤورور گلیر
عشق ذؤقوندن اوُزاقلاشما، کنار اولما، دئدی

١خزردن اسن نسیم.
٢باکیدا قورودان خزره ساری اسن یئل .