قان یئری وار!

اوزونده بوسه دن، ای گول، ایکی نشان یئری وار
بیرینده قیرمیزیلیقدیر، بیرینده قان یئری وار
گؤزونده واردیر اوخ آتماق، مُشه نده قان تؤ کمک
قاشیندا، سهو دئییلدیر، دئسم، کامان یئری وار
ساچین توتاندا عذاره،بیله خیال ائدیرم
چمنده برگِ گول اوسته قارا دومان یئری وار
بلایا سالما منی، درد محنتیم چوخدور
نه دیلده تاب قالیبدر، نه ده توان یئری وار
وفاسی اولماسادا، یاردن ال اوزمه، کؤنول!
گلرترّحمه بیر گون، یئنه گمان یئری وار
رقیبه همدم اولوب، دلبریم کوسوب مندن
بئله گمان ائدیرم، بلکه بیر اوُمان یئری وار
وفالی سؤیله دیگین چیخدی بیوفا آخیر
سنین سؤزونده ده، واحد، بیر آز یالان یئری وار