پیرانه لیک ده

ائشیتدیم، سئوگیلیم، کوسموسن مندن؟
قاچیرما بولبولو اؤز چمنیندن
منیمله دوز دولان، کوسرم سندن
منده دوستلوق دا وار، بیگانه لیک ده!
بیر سنسن بو مجنون کؤنلومه اویغون
سنین جمالینا اولموشام وورغون
هر لیلی عشقینده دئییلم مجنون
منده کمال دا وار، دیوانه لیک ده!
بوتون بو دونیانی گزدیم، دولاندیم
بیر سنی اؤزومه وفالی ساندیم
سن گزدین اؤزگئیله، اود توتوب یاندیم
منده آتش ده وار پروانه لیک ده!
ازلدن دئمیشم سنینله یارام
یولوندا اؤلسم ده بیل بختیارام
دئدیگیم سؤزومده من یئنه وارام
منده کجلیک ده وار مردانه لیک ده!
واحد، بو بیر سؤزون مین لعله دگر
منه گرک دئییل نه ثروت، نه زر
طبعم خزینه دیر، سؤزلریم گوهر
منده گنجلیک ده وار پیرانه لیک ده!