مهرِ جهان آرا اوزون!

ائتدی پنهان زولف ایچینده اول ملک سیما اوزون
گیزله‌میش ابر ایچره سان، مهرِ جهان آرا اوزون
لیلی ساچلی بیر پری مجنونه دؤندرمیش منی
رحمه گلمز توتسادا، آهیم اودو دونیا اوزون
غرق اولوبدور سیلِ غم ایچره وجودوم اؤیله کیم
بنزرم من اول حبابه کیم، توتار دریا اوزون
یوز گؤزل، اؤز سسئوگیلیمدن باشقا آچماز کؤنلومی
شبهه سیز، مجنونا گوسترسین گرگ لیلا اوزون
یارسیز، گول اوزلو جانان سیز، بوساطِ باده ده
قان اولور کؤنلوم، گؤزوم گورسه، مئیِ حمرا اوزون
یوز کؤنول، مین ناز ایله باخدیقجا قان ائتسین گرک
گؤسترینجه عاشیقه بیر دم گولِ رعنا اوزون
بیر منیم کؤنلوم دئییل دیوانه سی مه رولارین
من کیمی مینلرجه مجنونلار توتوب صحرا اوزون
زولف دن. دیوانه دن دیر هر سؤزون شاعیر یئنه
گؤسترر بیر گون سنه عارف لر استهزاء اوزون
واحدا، اول بیوفا اغیاره یوزمین لطف ائدر
گؤسترر امّا منِ مسکینه استغنا اوزون