گوزله‌سن

صیاد ‌ایسن، تور قوروبسان، داغی گوزله، گوزله سن!
بزرگانسان، یولون کسر یاغی، گوزله، گوزله سن!
هرجائیله آشنا اولما، نامرده بئل باغلاما،
مخنث قاتار آشینا آغی، گوزله، گوزله سن!
گیغ ساتان، چاشیر ساتانلار دییر قاخداغان بیزه،
چای ایچیب، پلو یینلر هئچ گوسترمیر نان بیزه؛
اولسا فرصت، ویرسه نصرت قادر سبحان بیزه،
چوخلارینی ائیلرم من، ساقی، گوزله، گوزله من..!
هانی حیدر، هانی حسن، هانی سردار، مصطفی؟ ‏
سایه مرحمتیله بیر زمان سوردوك صفا.
آخرین زای ائیله‌دین سن، آی بیمروت، بی‌وفا!
آچ سینمده دوگونه باخ، داغی گوزله، گوزله سن!
ایدیر طغیان، ویرمیر امان، تالان ایدیر ائللری،
باشلار کسیر، داردان آسیر، قیریر آتا بللری.
داغلار آلیر، نعره سالیر، ناحق کسیر دیللری.
دفعی دونن، چرخی چونن چاغی گوزله، گوزله سن!
علی‌عسگرله بد باشلادین جوان وقتیندن، فلك!
نچه-نچه سلیمانلار سالدین تختیندن، فلك!
اولار اولدو درد و غم دوستاغی، گوزله، گوزله سن!