اینجیمرم

ایستر دارا چکدیر، ایستر قول ائیله،
قویموشام امرینه قول، اینجیمرم.
حسرتیندن مجنون اولدوم سحرادا
آلیرسان جانیمی آل، اینجیمرم.
حسرتیندن سارالیبان سولانام.
اذن ویرسن، یار، باشینا دولانام.
اللی یول چاپیلام، یوز یول تالانام،
بیر شئی دگیل دولت، مال، اینجیمرم.
علی‌عسگرم، یاندیم عشق آتشیندا،
گوزوم قالدی کرپیگینده، قاشیندا،
قازدیر مزاریمی چشمه باشیندا،
سال سینم اوستوندن یول، اینجیمرم.