گیدیبدی

ایشیدین مجلسده عارف اولانلار،
صرافام، گوهریم، کانیم گیدیبدی.
آه چکیبن، یار یولونا باخماقدان،
یقین بیلین، یاری جانیم گیدیبدی.
نازك بارماخلیدی، شمشاد اللیدی،
آینا قاباخلیدی، سیاه تللیدی،
شکر صحبتلیدی، شیرین دیللیدی،
طوطی کیمی خوش زبانیم گیدیبدی.
مدتدی گوزومدن اولوبدو ایراق،
اریدیب اوره‌گیم درد و غم، فراق،
بیللور بوخاق، لاله یاناق، آی قاباق.
آلا گوزلو صحنه‌بانیم گیدیبدی.
ایش سنه آگاهدی، قادر الهی..!
عشق الیندن ایتیرمیشم ایراهی.
علی‌عسگرم، بودو سؤزون کوتاهی،
یار گیدندن دین ـ ایمانيم گیدیبدی.