کؤرپه‌میز اولسون، اولماسین؟

مصلحت ائیلرم سانا، کؤرپه‌میز اولسون، اولماسین؟
کؤرپه یۆز اللی شیروانا، کؤرپه‌میز اولسون، اولماسین؟

خئیلی گؤتور-قوی ائتمیشیک، بورجا گیریب توی ائتمیشیک،
هر ایکیمیز ده هم‌خانا، کؤرپه‌میز اولسون، اولماسین؟

بورجو سلمنن آلمیشیق، دردنن-اَلَمنن آلمیشیق،
بورجو وئرن ده بیر «دانا»، کؤرپه‌میز اولسون، اولماسین؟

باخمیر حکیملر ایمکانا، خطّ چکیلیبدی ویجدانا،
یا اؤل، یا پول وئر، اول آنا، کؤرپه‌میز اولسون، اولماسین؟

یاشی چاتاندا یئددی‌یه، گۆن بۆکولور گؤی اسگی‌یه،
دؤنور تدریسی «شیروانا»، کؤرپه‌میز اولسون، اولماسین؟

کؤرپه سوروشسا بیر زامان، آی آتا، یوردوم هاردادیر،
من نه جاواب وئریم اونا، کؤرپه‌میز اولسون، اولماسین؟

وئرمه عذابی پۆنهانا، قؽیما او یازیق اینسانا،
وئر بو سوالی سۆبحانا، کؤرپه‌میز اولسون، اولماسین؟