تورپاغی احسانلیق اولار

مین گۆناهین جاوابی حشرده بیر آنلیق اولار،
جمعی بیر آنین ایچینده هره بیر یانلیق اولار.

باشووا دؤیمگینن گئتسه الیندن وطنین،
گؤیه باغلانمایانین تورپاغی احسانلیق اولار.

ائرمنی آروادین ایله آرانی وورما هله،
یۆکسک ایستاتوس اولان واختی پئشیمانلیق اولار.

بو ائلین باشینا کیم سالدی دییرمان داشینی،
گۆن گلر کی، اونون اؤز باشی دییرمانلیق اولار.

نئچه ائولر یؽخیب اۆستونده سارایلار تیکنین،
رسمدیر خلقی اۆچون قلبی قبیریستانلیق اولار.

نفسه قوللوق ائدنین رۆتبه‌سی شئیطان نؤکری،
حاقا قوللوق ائدنین رۆتبه‌سی اینسانلیق اولار.

گۆنلرین بیر گۆنو پۆنهان بابادان آیری دۆشر،
بابا تورپاقلیق اولار، پۆنهان آسیمانلیق اولار.