منو
ویجدان شاهیدلیگی
هردن عذاب ساتار، غم آلار منی،
منیم بو دۆنیادا چوخ خاطام اولوب.
سهولر، قۆصورلار، خاطالار منی
یئنیدن یارادان اؤز آتام اولوب.
خاطالار اۆستونده بوی آتمیشام من،
اؤزومو یئنیدن یاراتمیشام من.
سهویمه، خاطاما هامیدان قاباق
شاهید ده، حاکیم ده ویجداندیر آنجاق.
بئله بیر مقامدا وکیل لال اولور،
حاق کسیر، یالانسا پاییمال اولور.
شاهیدیم، وکیلیم، حاکیمیم ده من،
قاچماق مۆمکونمودور بو محکمه‌دن؟
ویجدان شاهیدلیگی! کؤنوللو دوستاق!
اؤزوندن کؤنوللو اینتیقام آلماق!
ویجدان شاهیدلیگی! بیر حؤکمدار تک
اؤزونه چکدیگین اؤز سینه داغین.
ویجدان شاهیدلیگی! اؤزونو گؤرمک،
اؤزونون اؤزونه تسلیم اولماغین.
اؤزونو گؤرمه‌ین گؤرمز اؤزگه‌نی،
سؤزونو آنلاماز، اؤزونو بیلمز.
اؤزونو بیلمه‌ین بیلمز کیمسه‌نی،
ایری‌یه اییلر، دۆزه اییلمز.
شاهیدین، وکیلین، حاکیمین ده سن،
قاچماق مۆمکونمودور بو محکمه‌دن؟