گؤزلهمه اوتاغیندا
ساعتلارلا گؤزلرین
لال قاپییا دیکیلر.
منیم نه چکدیگیمی
قاپیلار آرخاسیندا
مۆرگو دؤینلر بیلر.
اۆرگینده بؤیویور،
دوداغیندا کیچیلیر
سؤزون ده، سوالین دا.
آخ!.. بیزیم عؤمروموزون
گؤرن نئچه پارچاسی
اریییب کۆله دؤنموش
قاپیلارین دالیندا؟
قاپیلار آرخاسیندا
بیز نه قدر دورموشوق.
نئچه گؤزل آرزونو
سیقار تۆستولریله
هاوایا سووورموشوق.
آخ، سرت اۆزلو قاپیلار،
ایکی اۆزلو قاپیلار
طالعلر حلّ اولونور
قاپینین او اۆزونده.
آداملار بوینوبوکوک
اگلشیب مات-معطّل
قاپینین بو اۆزونده.
دیندیرسن گلر دیله
قاپیلارین آغزینا
سپیلن توزلار بئله.
اونلار توز دئییل، آنجاق
قاپیلارا توخونوب
آیاقلارین آلتینا
تؤکولن آرزولاردیر.
اۆرکلرده دوغولوب،
بیرجه "یوخ" کلمهسیله
یوخ اولان آرزولاردیر.
آخ!.. بو بیر کلمه "یوخ"اون
آرخاسیندا نهلر وار،
نئچه اگیلمهلر وار.
او "یوخ" دئییر، بو، یوخدان،
او اؤزو ده خوشلانیر.
دئییرم کی،
یالتاقلیق دا،
قورخاقلیق دا
ائله بوردان باشلانیر.
سیز ای مئشین قاپیلار،
سیز ای مئشین قاپیلار،
سیزین اۆزونوز سویوق؛
سیزدن اۆمیدله گیریب،
اۆمیدسیز چؽخان دا چوخ.
سیزی تپیکلریله
ووروب آچان تاپیلار،
سیز ای باغلی قاپیلار،
قاشقاباقلی قاپیلار!