منو
ماوی گؤزلو مریم
ساریشین بیر قؽز ایدی مریم،
قؽزلار بولاغیندان
سو ایچمه‌میشدی هله.
آیاق‌یالین، باشی‌آچیق،
کۆچه‌ده اویناردی رفیقه‌لریله.
گۆنده بیر آرپا بویدا
بؤیویردی مریم.
کیمسه بیلمیردی آنجاق،
بیر گۆن سو ایچدی او دا.
قؽزلار بولاغیندان.
آیریلدی،
آیاق‌یالین، باشی‌آچیق اوینادیغی
اوشاقلیق چاغیندان.
آی شفقی کیمی ساچلار
آچیلدی قولاج-قولاج،
تؤکولدو مرمر چیینلرینه
حالقا-حالقا.
ماوی گؤزلرده اولدوزلار آلیشدی.
شؤعله‌سی دالغا-دالغا.
بیر گۆن ده
کؤکسونون ایچینده
بیر ایشیق یاندی مریمین.
دۆنیا گؤزلرینده دگیشیب
تزه مریمین.
بو یانغی‌نین نورونا بۆروندو
ائله بیل یئر اۆزو.
نه اولدو مریمه؟
بیلمیردی اؤزو...
کؤکسونده آلیشان
نه یانغی، نه حرارت ایدی؟
سانکی افسانه‌لی بیر عالمه
اوچوردو مریم.
بلکه بو یانغی محبّت ایدی،
اونون آردینجا قاچیردی مریم؟
قاچیردی،
بیلمیردی بو سئوینجینلرینده
ساری دالغالار.
قاچیردی،
بیلمیردی بو سئوینجین
عذابلی سونو وار...
هر شئی گؤزل ایدی
گؤزونده اونون.
یئنی بیر دۆنیا واردی
اؤزونده اونون...
ائله بیل کیمسه چاغیریردی مریمی
وار سسیله.
مریم گئدیردی،
فقط بیلمیردی
کیمین ایرادسیله.
بیلمیردی،
سئوینج الله‌ی – گئت –دئییر،
عذاب تانری‌سی - گل – دئییر اونا.
مریم گئدیردی.
فؽرتینالی بیر حیاتین قوینونا...
گۆنلر، آیلار اؤتدو،
بیر گۆن ده مریم قاییتدی
افسانه‌لر عالمیندن
حقیقت دۆنیاسینا...
سؽغینیب قوجاغینداکی جاغاسینا،
یئنه ده قاچیردی
باشی‌آچیق، آیاق‌یالین.
اونودوب سئوینجین، هوسین، ایده‌آلین
قاچیردی اؤزو اؤزوندن،
اؤز کؤلگه‌سیندن.
قاچیردی آداملارین طعنه‌سیندن.
غضبیندن، نیفرتیندن.
قاچیردی،
دۆنن قوینونا سؽغیندیغی
افسانه‌لی بیر عالمدن -
محبّتیندن...
قاچیردی مریم،
کند-کند،
شهر-شهر،
اؤلکه-اؤلکه
قاچیردی،
کیمسه‌سیز بیر دۆنیا تاپیب
سؽغینا بلکه...
بئله‌جه قاچدی مریم
نئچه ایل، نئچه عصر.
تاریخین یوللارینا چیللندی
آیاقلارینن قانی.
ترک ائتدی
اونو دامغالایان بیر دۆنیانی...
اؽندی مریم آنا
سؽغینیب نئچه ائوده
قارانلیق بوجاغا،
باخیر دیواردان:
اونون محبّتینی
بوینوندا گزدیرن اینسانلارا
حئیران-حئیران...
۱۹۸۳