آدام اول آدام

انسان اوغلو وارین واردیر مبارک
وارین اؤز یئرینده، آدام اول آدام
اون سگگیز چرخ ماشینین وار مبارک
اودا اؤز یئرینده، آدام اول آدام
پولون واردی ثروتین وار قوی اولسون
گوجون واردی قدرتین وار قوی اولسون
آدین واردی شهرتین وار قوی اولسون
اونلار اؤز یئرینده آدام اول آدام
یا دکترسن یا قاضی یا مهندس
یا تاجرسن یا آغاسان یا رئیس
زامان کئچیب گئدر یا یاخشی یا پیس
هرنه اؤز یئرینده آدام اول آدام
دده‌کاتیب بیر آز آرتیق دانیشدین
دانیشدیقجا آتش آلیب آلیشدین
حاجی اولدون حاجی‌لارا قاریشدین
حاجی‌لیق یئرینده آدام اول آدام.