منو
اسیر دام عشقین اولالی، سندن وفا گؤرمن
پریشان حالین اولدیم، سورمادین حال پریشانیم،
غمیندن درده دوشدیم، قیلمادین تدبیر درمانیم،
نه دئرسن، روزگاریم بؤیله‌می کئچسین، گؤزل جانیم!
گؤزوم، جانیم، افندیم، سئودیگیم، دولتلی سلطانیم!
اسیر دام عشقین اولالی، سندن وفا گؤرمن،
سنی هر قاندا گؤرسم، اهل درده آشنا گؤرمن،
وفا و آشنالیق رسمینی سندن روا گؤرمن،
گؤزوم، جانیم، افندیم، سئودیگیم، دولتلی سلطانیم!
دگر هر دم وفاسیز چرخ یاییندان منه بیر اوخ،
کیمه شرح ائیله‌ییم کیم، محنت و اندوه و دردیم چوخ،
سنه قالدی مروت، سندن اؤزگه هیچ کیمسه‌م یوخ،
گؤزوم، جانیم، افندیم، سئودیگیم، دولتلی سلطانیم!
گؤزومدن دم‌به‌دم باغریم ازیب یاشیم کیمی گئتمه!
سنی ترک ائتمزم چون من، منی سن داخی ترک ائتمه!
ایکن اولما هم ظالم، من کیمی مظلومی اینجیتمه!
گؤزوم، جانیم، افندیم، سئودیگیم، دولتلی سلطانیم!
قاتی کؤنلون نه‌دن بو ظلمیله بیداده راغیب دیر،
گؤزل‌لر نسبتی اولماز جفا، سندن نه واجب دیر؟
سنین تک نازنینه، نازنین ایشلر مناسب دیر،
گؤزوم، جانیم، افندیم، سئودیگیم، دولتلی سلطانیم!
نظر قیلمازسان اهل درد گؤزدن آخی دان سئیله،
یامانلیق دیر عیشین عشاق ایله یاخشی دگل بؤیله؟
گل، الله-ی سئویرسن، عاشقه جور ائتمه، لطف ایله،
گؤزوم، جانیم، افندیم، سئودیگیم، دولتلی سلطانیم!
فضولی شیوۀ رفتارین ایستر، بیر گدایین دیر،
دیریلدیکجه سنین کویین یولوندا خاک پایین دیر،
گرک اؤلدور، گرک قوی، حکم – حکم و رأیین دیر،
گؤزوم، جانیم، افندیم، سئودیگیم، دولتلی سلطانیم!