منو
لحظه – لحظه مدعی لر پندینی گوش ائیله دین
( «لیلی و مجنون» مثنویسیندن)
غیر ایله هر دم نه دیر سیر گلستان ائتدیگین؟
بزم ائدیب، خلوت قیلیب، یوز لطف و احسان ائتدیگین؟
عهد بنیادین مروتدیرمی ویران ائتدیگین؟
قانی، ای ظالم، بیزیمله عهد و پیمان ائتدیگین!؟
لحظه – لحظه مدعی‌لر پندینی گوش ائیله‌دین،
قانه قانه غیر جام شوقینی نوش ائیله‌دین،
واره واره عهد و پیمانی فراموش ائیله‌دین،
قانی، ای ظالم، بیزیمله عهد و پیمان ائتدیگین!؟
غیره سالیب مهرینی بیزدن سووتدون عاقبت،
ترک مهر ائتدین، طریق ظلم توتدون عاقبت،
عهدلر، پیمانلار ائتمیشدیک، اونوتدون عاقبت،
قانی، ای ظالم، بیزیمله عهد و پیمان ائتدیگین!؟
جورموموز نولدی کی، بیزدن ائیله‌دین بیزارلیق؟
بیز غمین چکدیک، سن ائتدین اؤزگه‌یه غمخوارلیق؟
سیزده عادت بومودور؟ بؤیله اولورمی یارلیق؟
قانی، ای ظالم، بیزیمله عهد و پیمان ائتدیگین!؟
چرخ تک بدمهرلیک رسمینی بنیاد ائیله‌دین،
یاخشی آدین وار ایکن، دؤندون یامان آد ائیله‌دین،
دؤنه دؤنه بیزی غمناک، اؤزگه‌نی شاد ائیله‌دین،
قانی ای ظالم، بیزیمله عهد و پیمان ائتدیگین!؟
کؤنلومیز من‌بعد زلفونچون پریشان اولماسین،
باغریمیز لعلین هواسیله داخی قان اولماسین،
بیوفاسان! چشمیمیز یادینلا گریان اولماسین،
قانی، ای ظالم، بیزیمله عهد و پیمان ائتدیگین!؟
وعدۀ وصل ایله آلدین صبریمیز، آرامیمیز،
اولمادی بیر گون وصالیندان میسر کامیمیز،
کئچدی هجر ایله، فضولی‌دن بئتر ایّامیمیز،
قانی، ای ظالم، بیزیمله عهد و پیمان ائتدیگین!؟