هیچ کیم یوخدور کی، نالمدن شکایت ائیله مز

چهرۀ زردیمده گؤر همدم سرشک آلیمی،
اول گل رعنایه بو رنگ ایله بیلدیر حالیمی.
تا کی، سرویم باسه باشیم اوزره گاهی بیر قدم،
ای مصور، رهگذاری اوزره چک تمثالیمی.
ای فلک، یوخدور لباس فقردن عاریم منیم،
اطلسیندن بیلمیشم اوستون محقر شالیمی.
ای خوش اول کیم، عشق حرفین بیر داخی تکرار ائدم،
حشر دیوانیندا گؤرجک نامۀ اعمالیمی.
هیچ کیم یوخدور کی، نالمدن شکایت ائیله مز،
شکر کیم، عرض ایله ین چوخدور سنه احوالیمی.
نیتیم اولدیر کی، رخسارین گؤروب جانیم وئرم،
مصحف رخسار آچیب، قیل مبارک فالیمی.
صبح وشام اول قبلۀ ابرو مقابل دیر منه،
ای فضولی، تانری گؤزدن ساخلاسین اقبالیمی.