گؤر نه رنگ ایله قیلیر اظهار هر مضمر صبا

آب لوحی اوزره چکمیش موج دن مسطر صبا،
سبزه دن نقل ائتمه یه وصف خط دلبر صبا.
آلماق ایچون قیمتیله سبزه دن شبنم دورین،
یاسمندن سیم تؤکموش، یا سمندن زر صبا.
آغزین اسرارین دلر فاش ائده، آچیب غنچه نی،
گؤر نه رنگ ایله قیلیر اظهار هر مضمر صبا.
انجمن لر سیر ائدیب نسرین بیاضین گزدیریر،
حسن خلقینده درست ائتمک دیلر محضر صبا.
انفعال ائتمیش مگر سرعتده رخشیندن سنین
کیم، گزر مخفی، گؤرونمز کیمسه یه مجهر صبا.
آختاریب بولماق دیلر وصف رخون کیم، متصل
نسخۀ گلبرگ اوراقین قیلیر ازبر صبا.
آبگون تیغینجه اولماز، بونجا دایم کیم وئرور
تیغ آب جویباره موج دن جوهر صبا.
آیاغین توپراغینی یئردن آلیر تعظیم ایله،
غالباً دوزمک دیلر باشینا بیر افسر صبا.
ائشیدیب دیر، غالباً، قددینله شمعین بحثینی،
هر قاچان گؤردیسه ائیلر شمعه قصد سر صبا.
آستانیندا مقیم اولماغا بولسایدی قبول،
حق بیلیر، اولمازدی سرگردان بحر و بر صبا.
آسمانه قدرله چیخسا نه حاصل، چون دئگیل
اونا قابل کیم، اولا قاپیندا خاک در صبا.
آتش بیداده گؤیموش دور، اولوبدور دادخواه،
گؤردوگو یئرده ساچار باشینا خاکستر صبا.
آب دریا اوزره گه ایلیاس وش سیران ائدر،
گاه ائیلر مسکن ابراهیم تک آزر صبا.
اوددان آفت گؤرمزه و سودان ضرر، گویا قیلیر
قاندا اولسا اقتدا شرع پیغمبر صبا.
احمد مرسل کی، فرمان بر سلیمان دیر اونا
ئویله کیم، گؤردو سلیمان اولدی فرمان بر صبا.
اول شاهنشه کیم، رضاسیله گزر هر قاندا وار،
گر شمال و گر دبورو گر جنوب و گر صبا.
ای گل باغ رسُل، بیر تازه گلشن دیر قاپون
کیم، دم جبریله اول گلشنده طعن ائیلر صبا.
ایسته‌ییب بولماز قاپون فیض آلماق ایچون، متصل
قانسی گلشن سیرینه گیرسه چیخیر مضطر صبا.
ایله تیر خاک درینی ذره ذره گلشنه،
قیلماق ایچون توتیای دیدۀ عبهر صبا.
آتش بیداد ایله عالم یانار، گر قیلماسا
عدلینی شایع، گزیب هر دم یئدی کشور صبا.
اولدوغی چون ذره تک پنهان گیروب گوشن لره
بی سبب رخت گل و نسرینه غارتگر صبا،
اؤز گناهینه شفاعت ایسته‌ییب، فریاد ائدیب
چیزگینور خاک مزارین اوزره تا محشر صبا.
ائتمزسم ترک تمنای طوافین چیخسا جان،
خاک هم اولسام غباریمنی سنه ایلتر صبا.
آچمیش امید ره وصلین دل پرخونیمی،
ئویله کیم اصل باهار آچار گل احمر صبا.
ئویله اینجلدیم، ضعیف اولدیم کی، خاک کویینه
قابلم خاشاکی تک اولسا منه رهبر صبا.
التماسیم بختدن اولدیر کی، حکمون عالمه،
اولا جاری تا چمن ملکونده دیر سرور صبا،
اولا نعتیندن فضولی نین کلامی دلپزیر،
ئویله کیم، گولدن بولور انفاس جانپرور صبا.