جلوه ائیلر ماه نو، ائل قارشیسیندا شام عید

ای هلال عید، قالیب دیر سنه ابروی یار،
حسن صورت سنده بیر وار ایسه، اوندا ایکی وار.
یار ابروسینه بنزتمم سنی، ای ماه نو،
سن گونش بیرله گؤرونمزسن، سنه نه اعتبار.
قاشلاریندان دیر خجل گویا هلال عید کیم،
گئجه اسکیک گؤرونور، گوندوز چوخ اولماز آشکار.
جلوه ائیلر ماه نو، ائل قارشیسیندا شام عید،
سن گیریب اورتایا قاشین گؤستر، اول دوتسون کنار.
ناتوان گؤردوم هلال عیدی دون یاریم کیمی،
اول داخی گویا کی، ضعف روزه دن اولموش نزار.
یئنی آیی قاشلارین سوداسی رسوا ائیله‌میش،
گؤستریرلر بیر بیرینه اونی اهل روزگار.
ماه نو دیر بیلمزم تابان شفقدن، یوخسا کیم،
قانا باتمیش نوک شمشیر امیر نامدار.
اول سرافراز فلک رفعت کی، رأی روشنی
ائیله‌میشدیر رفع مرآت حقایقدن غبار.
جوهر پاکیزۀ ذات شریف کاملی
عالمه لطف و مروّت معده نیندن یادگار.
شفقت و قهرائیله دیر بیر سایه گستر نخل کیم،
تاک دیر اصلی، وئریر هم غوره، هم انگور بار.
قهری اول رنگ ایله کیم دریا مزاجین خشک ائدر،
چالسا گر موسی صفت دریایه تیغ آبدار.
شفقتی اول رسمه کیم، آتش طبیعتدن چیخار،
سالسا ابراهیم وش عود اوزره لطف ایله گذار.
هم طریق معدلت رأییندن اونون مستقیم،
هم اساس ععافیت عدلیندن اونون استوار.
ای صفای مشربین ملک ازل تک بیکران،
وی محیط همتین بحر ابد تک بیکنار.
گر سن اولسایدین امیر شوکت اسکندری،
وادی حکمتده بولمازدی ارسطو اشتهار.
ور سن ائتسه یدین قبول منت نوشیروان.
ائیله مزدی هیچ کیم بوذرجمهره اعتبار.
محض شرع اولموش عفاک الله وجود کاملین
فیض تفسیر و حدیث و فقه دن لیل و نهار.
صفحۀ مهر رخون دور موضع مور نبی،
چار طبع کاملین مأوای مهر چاریار.