بیر خبر وئر، ای صبا! اول داسیتانیمدان منیم

بیر خبر وئر، ای صبا! اول داسیتانیمدان منیم،
کیم اونون عشقی جدا اولماز بو جانیمدان منیم.
بولبول دل زار پئیغامین آپار لوطفیله وار،
بیر پیام آلگیل یئنه اول گولسیتانیمدان منیم.
کوی جاناندان ایراق اولدوم، دریغ و آه! کیم،
خئیلی دمدیر آیرییام اول خان و مانیمدان منیم.
جانینا اودلار توشوب هر لحظه انجم چرخ اورار،
بیر گئجه یومماز گؤزون آه و فغانیمدان منیم.
گؤیلری تاریک ائدن سانمین بولوتلاردیر یئنه،
تیره اولموشدور فلک دود و دوخانیمدان منیم.
اول طبیب مهربان اولمادی آخیر باخبر،
بو دل بیمار و زار ناتوانیمدان منیم.
ای غریبی! بنده نومید اولماگیل هر کامینی،
ایسته شاه کامبخش کامرانیمدان منیم.