بیر سحر پیری-موغانی چۆن زیارت ائیله‌دیم

بیر سحر پیری-موغانی چۆن زیارت ائیله‌دیم،
آیاغیندا باش قودوم، چوخ-چوخ عیبادت ائیله‌دیم.

بیر عجب رطلی-گیران سوندو الومه پیری-مست،
آلدیم ایچدیم، جان و دیل مۆلکون عیمارت ائیله‌دیم.

چۆن منی مست ائیله‌دی اول رطلیله پیری-موغان،
من دخی مۆطریبله ساقی‌یه ایشارت ائیله‌دیم.

مۆطریبا، راست گو نواده چۆن دۆزتدیم چنگینی،
عاکیفی-مئیخانه‌‌یه چۆنکیم بشارت ائیله‌دیم.

جم اولوب کاشانه ایچره، نوش قؽلدیق جامی-مئی،
ساقی‌یی-مه‌رویی گؤردوم، چوخ شطارت ائیله‌دیم.

جان و کؤنلو، عقل و دینی ج‍ۆمله وئردیم ساقی‌یه،
شول زیانگر صوفی‌یه سانکیم خسارت ائیله‌دیم.

پۆرگوشاییش اولدوغومو گؤردو، دئر: ائی بینوا،
چوخ سئوینمه، جیسم و جانی یوخسا غارت ائیله‌دیم.

ائشیدوب پیرون سؤزون، ایچتوم حۆضوری-قلب ایله،
ج‍ۆمله ایسقاطی-صلاتیمه کفارت ائیله‌دیم.

بیر زامان چۆن ساکینی-مئیخانه اولدوم پؽر ایله،
نفسی-شوم ایّامی‌نی خئیلی حقارت ائیله‌دیم.

پیریمون بیر جۆرعه‌سینه ساتمام ایکی کؤونی من،
ائی حبیبی، کئی بیلورسن خوش تیجارت ائیله‌دیم.