چین ائلیندن چین سحر چۆن شول بۆتی-زیبا گلور،
که-آی و گۆندن رۆخلارینین پرتؤوی-زیبا گلور.
چۆن گلور مین ناز ایله اول سروی-سیماندام یار،
ساناسان مجنونه لئیلی، وامیقه عذرا گلور.
ائی کی، قدّی-دیلبری سروی-سهییه بنزهدن،
راست ائت، بالله، نظر کیم، مۆنتها بالا گلور.
مۆصحفی-حۆسنون تفأل ائتدوگومجه روز و شب،
طالعیمده گؤرونن بو سورهیی-طاها گلور.
هر قاچان بادی-سحر دپرتسه مۆشکین زۆلفینی،
خاطیریم اولور پریشان، باشوما سئودا گلور.
حوری-عینه دعوت ائتمه منی، واعیظ، وارمازام،
حۆسن ایچینده چۆنکی، شول بیمیثل و بیهمتا گلور.
نرگیسی-مخموره دین کیم، تا کی خودبین اولماسون،
باغ ایچینده سئیر ائده شول گؤزلری شهلا گلور.
کعبهیی-کویین زیارت ائتمهیه بادی-صبا،
ائشیگینه هر سحرگاه بیسر و بیپا گلور.
آل الیندن آیاغی، قوی آیاغیندا باشونی،
ساقییی-زؤهره-جبین، گۆن یۆزلی مهسیما گلور.
قاپوسوندا گوشی حلقه قؽلدیغیم بو که-ائشیدم،
تا کی دئیه رحم ائدوب شول عاشیقی-رۆسوا گلور.
خسته دیل اولدوغونا، غم یئمه، ائی جان، دمبهدم
ذی سعادت کیم قولونو گؤرمگه مؤلا گلور.
چۆن حبیبی گؤردو بو گۆن دیلبرین دیدارینی،
سانما آنون کؤنلونه آیروق غۆصّهیی-فردا گلور.