من ایچدیم گنجیمی تک کئفلهنیب ویرانهلر یاندی
اؤزوم یاندیم کول اولدوم اود توتوب میخانهلر یاندی
گونش اوز دوندهریب سؤنمز اودومدان احتیاط ائتدی
مداریندان چیخان منزل به منزل خانهلر یاندی
تانیشلیقدان سیغینمیشلار سالیر یول اؤزگهلیکلردن
باخیب گئندن گؤرن احوالیمی بیگانهلر یاندی
بو عشقین خیردالانمیش بؤلگوسوندن خیردا تمثیللر
سپیلمیش گؤی دؤشونده اولدوز-اولدوز دانهلر یاندی
سوروشدوم عشقین آق ساققاللارنیدان هجره بیرچاره
کتاب وصلینه ابجد یازان فرزانهلر یاندی
منیم تک خام قالانلاردیر دییهنلر یانماق احوالین
یانانلاردان اثر یوخدور دئسینلر تا، نهلر یاندی
صلاحدیر بیلمهسین اؤز محتواسین هر یئتن عشقه
آلیشماقدان گؤرهرسن بیر به بیر پیمانهلر یاندی
ایشیم وورغون گۆنش تک عالمه نور پایلاماقلاردیر
یاریب باغرین سحر تک داغلانان دیوانهلر یاندی