من دیل دوداق سن سؤز کیمی دیندیر منی دیندیر منی
من گوزگی سن اولگوز کیمی سیندیر منی سیندیر منی
مندن منّیت باشلانیب، یولسوزلارا یولداشلانیب
باغریمدا هیجران باشلانیب من سیزلیگه ائندیر منی
من کلمه سن معنا کیمی من آرزی سن سینا کیمی
من شیشه سن مینا کیمی وصلینله بللهندیر منی
سن دویغو من دیوانه تک سن باده من پیمانه تک
سن شعله من پروانه تک یاندیر منی یاندیر منی
پایلانمیشام چوخلوقلارا بیلمیر اوزوم دؤنسون هارا
ارشاد ائله یوخلوقلارا، بیرلیکله دیللهندیر منی