سورغون…

سورغون دولانان جانلارا بار وار باخیشیندا
سئودا تؤره‌دیر سانکی بهار وار باخیشیندا
هر کس اؤزون اؤلچور او گؤزون گوزگولرینده
هر اؤلچه‌نه اؤز قدرینه یار وار باخیشیندا
قلب اولسادا قلبین نه محک‌دن اوشونورسن
اکسیر کیمی بیر باشقا عیار وار باخیشیندا
درد اهلی گؤره‌ن عالمی بیر باشقاسی گؤرمز
بیگانه‌لره قارشی دووار وار باخیشیندا
قهریله قفیل‌لانما اورک مرتبه‌سینده
آی غصه الفباسی آچار وار باخیشیندا
آیا نه خطا سؤز سووشوب دیل دؤنوموندن
یول وئرمه‌دی اظهاره غبار وار باخیشیندا
صبر ائیله سحر باخمادا یوخ‌سانسا سیخینما
یوخلوقدا یاخینلیق کیمی وار وار باخیشیندا