مگر سسینده…

مگر سسینده محبّت سنین زبانه چکیر
کی کؤنلومون ساچینا کلمه-کلمه شانه چکیر
وئریر اوزاخلارا دوشموش‌لره یاخین وعده
کؤنوللرین دؤشونه شوقیلن نشانه چکیر
شکردی بال‌دی سسین موشتولوقلی حال‌دی سسین
دوگونلو دیل‌لری، مفتاح اولور بیانه چکیر
سالیر اورک‌لر ائویندن غم اقتدارین اوزاق
پاریلدادیر سئویمین جلوه‌سین عیانه چکیر
تومارلاییر نفسین یولدا خسته‌لر اورگین
شکسته‌لر اورگین محضر امانه چکیر
سنین سسین‌دی سئویم یا سئویم سنین نفسین
سسینده یازیئلی گول طرحین عاشقانه چکیر
گؤنش سایاقلی سسیندین سئویملی بیر سحرم
اگرچی آیریلیقین باغریمی فغانه چکیر