دربدر…

دربدر ائتمه عالمی اهل نیازیله دانیش
قبلا عشق رحمه گل اهل نمازیله دانیش
هانسی بولوت جسارتی کؤلگه سالیب حضورونا
زحمهٔ امری سال ایشه بیرینی سازیله دانیش
سؤزلرینین گئنیشلیگی سیغمادی باغلی فکریمه
محرم راز ائیله منی محرم رازیله دانیش
سؤز اوروجوندا سیغمیان معنی یالین‌لارین گئیین
فطرهٔ مستحق دییه قامت نازیله دانیش
ساز تئلینه توخونمیان زخمه‌لرین فغانی‌ام
مرحمت شفاعت اول زخمه نوازیله دانیش
کلمه سحر کیمین گزیر معنی گونش‌لرین تاپا
نور ساچاخین نیاز ائله اهل نیازیله دانیش