او گۆنلر یوخویدو، یوخسا حقیقت،
بلکه بیر دۆگونلو سیرّ ایدی، گئتدی.
او آرزو، او اۆمید، او سؤز، او صؤحبت
دوداقدان سۆزولن دۆرّ ایدی، گئتدی.
شؽرشیرلار اویاندی، چاغلادی داغلار،
چیچکلر بویلاندی، بزندی باغلار.
بیز آیری دۆشهلی بیر غریب باهار،
یانیمدان خبرسیز یئریدی، گئتدی.
بولودلار اۆفوقه چکیلدی لای-لای،
زمیلر بیچیلدی، بوغدالار تای-تای
بیز آیری دۆشهلی بیر آلوولو یای
چؤللری، دۆزلری بۆرودو گئتدی.
بولاقلار بوینوندا اۆشودو یارپیز،
یارپاقلار، بوداقدان ائندی آرامسیز.
بیز آیری دۆشهلی بیر یورغون پاییز،
ساری چوخاسینی سۆرودو، گئتدی.
آخدی دامجی-دامجی بوز سالخیملاری،
سئللر یارالادی بۆرجو، حاصاری.
بیز آیری دۆشهلی بیر قؽشین قاری
گؤزومون ایچینده اریدی، گئتدی.
کؤنلومده دؤرد فصلین غمی، نیسگیلی،
مؤحنتین سونو یوخ، غمین ساحیلی،
یئتمیش ویداع ایلی، آیریلیق ایلی،
عؤمرون گۆنلرینین بیرییدی، گئتدی.