تۆرک اسیرلری

ائرکک، قادین، عسگر، چوجوق، ایختیار
— اسیر — دئیه، مینلرجه تۆرک اؤولادی:
ایسسیز بیر آدانین قوینوندا سؽزلار،
سورولماز دردی، دویولماز فریادی.

ایشته کینلی بیر مزارلیق کی هر گۆن
یؽغین-یؽغین اینسان اودار دا، دویماز؛
ساغلام وۆجودلار بئله دۆشگون، اؤلگون،
اۆمیدسیز بیر هئیکلدن فرق اولونماز.

گۆلومسرلر، فقط هپ گؤزلرینده
اینتیقاملی شیمشکلر چاخار، دورور.
چؽرپینیرلار، سولموش بنیزلرینده
بیر چوخ گیزلی، سؤنوک عمللر اویور.

یالنیز سویوق، یاغمور، بوران، فؽرتینا
اوخشار دورور بو محزون کؤنوللری؛
عۆریانلیق، خسته‌لیک، آجلیق بیر یانا،
سوسوزلوقدان هپ قوروموش دیللری.

آمانسیز قارتالین وحشی دؽرناغی
معصوم یاورولاری دیدیب پارچالار.
ایشته عدالت! ایلانلار یاتاغی
اینسانلارا مسکن وئریلمیش قرار.

نئرده او سرخوشلار کی هپ «قارداشلیق،
بیرلیک، برابرلیک» دئیه ساییقلار.
ایشته بیر وحشت کی، چکیلمز آرتیق،
دوست دئییل، دۆشمن بئله گؤرسه آغلار.

ای تۆرک ائلی! ای میلیونلار اؤلکه‌سی!
ساقین دویما نه‌دیر بو حال، بو دهشت؛
تیترتمه‌سین سنی بو قارداش سسی،
کورلوق، ساغیرلیق او دا بیر سعادت!...