ایشته نووروز! یئتیشدی فصل-باهار.
گلدی عیشرت زامانی، قارداشلار!
نه گؤزل بایرام... آه، نه خوش فۆرصت!
ساییلیر اهل-ذؤقه بیر نعمت!..
بؤیله شاد گۆن دۆشرمی بیر ده اله؟
کئچیرین بئش گۆن عؤمرو لذّت ایله.
یالینیز هانکی ائوده یاس وارسا،
بیر اونون بورجودور کی، توتسون عزا.
بیرینین اؤلسه قارداشی ناچار،
قارا بایرام توتار... بیر عادت وار.
هر کیمین یوخسا بؤیله بیر عۆذری،
عئیش و نوش ائیلهسین او... یوخ ضرری.
گرچی «المؤمنون اوخوه» دئمیش
امر-پئیغمبری حکایه ایمیش.
جۆمله قارداش، — دئییر رسول-خودا،
هانکی ایسلامهدیر بو سؤز عجبا؟
بلکه بیر باشقا خلقهدیر بو خیطاب؟
نهیه لازیم، جانیم، سؽخینتی، عذاب.
بۆتون ایراندا، جۆمله بالکاندا،
چؽرپینیر قارداشین قؽزیل قاندا!
ایشته بیر قتلگاهه دؤنموش یئر!
محو اولان یۆز دئییل کی! یۆز میندیر.
آنا! همشیره! ای نیشانلی گلین!
سیز ده اصلا سؽخیلمایین، سئوینین.
ازیلیب محو اولورسا عائلهلر،
سیزه عاید دئییل بو غملی خبر.
گئتسه عیفّت، کسیلسه امجکلر،
سئوینین!.. ایستهمز دۆشونجه، کدر.
بۆتون عالم داغیلسا، اود توتسا،
بیزه لازیمدیر ایمدی ذؤق و صفا.
بیر مۆسلمان کی، اوندا غئیرت وار.
سئوینیر، کئف ائدر، چالار، اوینار.
سئوینین! زورنا، توی چالین، سئوینین،
نه گؤزل بایرام! اوف، گۆلون، سئوینین!
دینه، ناموسا کۆسدونوزسه، گۆلون!
سئوینین، هپ گۆلون!.. نه نشئهلی گۆن؟!