چوبان تۆرکوسو

آچماسین چیچکلر، گۆلمه‌سین گۆللر،
اؤتوشمه‌سین شیرین دیللی بۆلبوللر،
دردیم چوقدور ائللر، ائللر، آی ائللر!
یار-یار دئییب گئجه-گۆندوز آغلارام.

گؤز یولا دیکمکدن باغریم اولدو قان،
بیر خبر یوق هیلال قاشلی یاریمدان،
یارالی کؤنلومو اولماز اوخشایان،
یار-یار دئییب گئجه-گۆندوز آغلارام.

گۆلمز، یۆز باهار اولسا، گۆلمز یۆزوم،
یاردان باشقا بیر گؤزل گؤرمز گؤزوم،
سانکی آنادان آیریلمیش اؤکسوزوم،
یار-یار دئییب گئجه-گۆندوز آغلارام.

اؤز یوردومدا بیر غریبدن سئچیلمم،
اسیر کیبی بیر دوست، بیر یاقین بیلمم،
جیهان جنّت اولسا، بیر لحظه گۆلمم،
یار-یار دئییب گئجه-گۆندوز آغلارام.

مجنون کؤنول لئیلاسینی اونوتماز،
باشقا بیر گؤزل دردیمی اویوتماز،
بیر مثلدیر: «ترلان یئرین سار توتماز!»
یار-یار دئییب گئجه-گۆندوز آغلارام.

گؤی یۆزونده گؤرور-گؤرمز هیلالی،
کئچر فیکریمدن یاریمین خیالی،
دربه‌در کؤنلومون آرتار ملالی،
یار-یار دئییب گئجه-گۆندوز آغلارام.

خاطیره گلدیکجه ماوی گؤزلری،
سۆزگون باقیشلاری، تاتلی سؤزلری،
دولاشیریم داغی، داشی، دۆزلری،
یار-یار دئییب گئجه-گۆندوز آغلارام.

یوسما دیلبریم دئییلمیش اداسیز،
پک نازلیدیر، اما دئییل وفاسیز،
نه چاره!؟ عشق اهلی اولماز بلاسیز،
یار-یار دئییب گئجه-گۆندوز آغلارام.