ای خدای لم یزال

زمانه سالدی عجب موحنت و ملال منی،
او ماهرو دن ایراق وئردی غم زواله منی.

توکندی تاب و توان، ای خدای لم یزال!
یا تئز بو جامینی آل، یا یئتیر وصاله منی!

سنه نه قدری دئدیم، رحم قیل منه، گئتمه!
گل ایندی گؤر کی، فراقین سالیب نه حاله منی!

نه واختا تک غم هیجرینده آه و زار چکیم؟
ترحم ائیله، گتیر سن ده بیر حیاله منی!

کسیلدی صبر و قراریم، فراقه تابیم یوخ،
روادی تنگه گتیرسین بو آه و ناله منی؟

آلیبدی عقلیمی سردن، قراریمی دیلدن،
ائدیب بلایه فلک، گؤر نئجه حواله منی.

تعجبم کی، نه اوچون رحمه گلمه دین، ظالیم؟
فراق اودونا یاخیب سالمیسان بو حاله منی.

نه یاخشی گونلر ایدی کیم، سنینله مونیس ایدیم،
زمانه ایندی ائدیب سینه داغلی لاله منی.

وصاله یئتمه یینبن زار و ناتوان قالدیم،
ائدیب فلک یئنه حسرت او مه جماله منی.