احمد، گۆللو، سارا، ببیر
درسلرینی یاخشی بیلیر.
بونلار اۆچون جوغرافیا
درسلری بیر بؤیوک بلا...
آخیر ثۆلوث ایمتاحانی
گلمیش... حاضیرلاشان هانی؟
گیرمیش مۆعلّیم صینیفه
هامسی قالمیش باخا-باخا...
مۆعلّیم سؤیلهییر: – سارا،
کۆر نهری تؤکولور هارا؟
– کۆر نهریمی؟ آغ دنیزه،
تؤکولمهده گزه-گزه.
مۆعلّیم سؤیلهییر: – گۆللو،
هارادادیر گؤیجه گؤلو؟
گۆللو بارماق قالدیراراق،
خریطهیه باخمایاراق،
– موسکوانین یانیندادیر.
احمد دئییر: – خاییر-خاییر،
گؤیجه گؤلو ایتالیادا...
اؽچینده واردیر بیر آدا.
دئمک بو دا بیلمهییردی،
ببیر دخی اسنهییردی.
مۆعلّیم ده سسلهنهرک،
دئدی: – ببیر، سؤیله گؤرک
کازبئک داغی هاردا اولور؟
ببیر هامان مغرور-مغرور:
– کازبئک داغی هیمالای
داغلارینین آراسیندا
اولان بؤیوک بیر تپهدیر.
هئی سیّاحلار گلیر-گئدیر.
یوخدور چؽخان زیروهسینه،
اونون قارلی تپهسینه.
– احمد! سن ده ناخچیوانی
هایدی بیزه گؤستر هانی؟
باخدی احمد خریطهیه،
گئتدی چؽخدی فرانسایا.
قؽش قوجالدی، گلدی باهار،
چیچکلندی، چمن گۆلزار،
گۆللر آچدی، چیچکلندی
کلبکلر بنکلندی.
آیدینلاشدی گؤیون اۆزو،
یاشیللاندی داغین دۆزو.
گؤی اۆزونده اوچان قوشلار
باشقا یئره کؤچن قوشلار؛
دسته-دسته گلیب بیزه،
سس سالدیلار داغا، دۆزه.
تعطیل واختی گلدی دئمک،
طلبهلر دینجهلهجک.
یاییلمیشدی بؤیله خبر.
اما بو ایل طلبهلر
چؽخاجاقدیر سیاحته.
اوشاقلار اولدو دؤرد دسته.
کۆر قؽراغین گزدی سارا؛
بیلدی کۆر آخیر خزره.
گۆللو دخی اؽراوانا
گئتمیش ایدی قانا-قانا.
بیلیردی کی، گؤیجه گؤلو
نه یئردهدیر، بیزیم گۆللو.
ببیر دخی گزه-گزه
گئدیب چؽخمیشدی تیفلیسه؛
گزیب گۆرجو تورپاغینی
بیلمیشدی کازبئک داغینی.
احمد دخی بیر دستهیله
گئتمیش ایدی ناخچیوانا.
باهار گئدیب، گلمیشدی قؽش.
هامی مکتبه توپلانمیش.
احمد، گۆللو، سارا، ببیر
درسلرینی یاخشی بیلیر.
خۆسوسیله چوغرافییا
درسیندن آلدیلار اعلا!
۱۹۲۹