سنین خندان اولور گۆل دوداقلارین
اوندا کی گؤزومدن یاشلار ساچیلیر،
چۆنکی سایهسینده گور بولاقلارین
چیچکلر آچیلیر، گۆللر آچیلیر.
اۆزون شفقلنیر من آه چکینجه،
چۆنکی اود قؽزارار اسینجه روزگار.
هر شئیین آخیری هئچدیرسه، منجه،
سنین گؤزللیگین گئتدیکجه آرتار.
چئویریب اۆزونو نرهیه دؤنسن،
کؤنلومون گؤزلری دۆشر آردینا،
چۆنکی طبیعتدن اؤیرنمیشم من،
گۆنهباخان باخار گۆنش یوردونا.
قوروموش گؤز یاشیم، او گۆل اۆزوندن
آخار، دایم آخار، دورمادان آخار،
سئللر جوشقون اولور چۆنکی، غفلتاً
دوغونجا گنجلیگین فصلی ایلک باهار.