تحصیلی-عۆلوم ائتمه کی، علم آفتی-جاندیر،
هم عقله زیاندیر؛
علم آفتی-جان اولدوغو مشهوری-جهاندیر،
معروفی-زماندیر؛
پندی پدرانهم ائشیت، ائی ساده جوانیم،
یاخما غمه جانیم!
خوش اول کسه کیم، وئل دولانیب، داغدا چوباندیر،
آسوده هماندیر!
علم ایچره خطا اولدوغون اوندان بیلیرم کیم،
بیلسه نولا هر کیم،
علمه گزهنین کۆفر و زبانلاردا بیاندیر،
تکفیره نیشاندیر.
مکتب سنه خوش گلمهسین، اول جایی-خطرناک،
گیرمه اونا چالاک؛
مکتب دئدیگین قئیدی-دیل و بندی-زباندیر،
غارتگری-جاندیر.
چئرنیل ندیر؟ اول قلبی قارا حۆقّهیی-دیلخون،
اولما اونا مفتون!
آغ گۆنلرینی ائتمه قارا، الله، آماندیر!
بو رنگ یاماندیر.
دفتر ندیر؟ اول هرزهلرین همدمی-رازی،
جؤوفی دولو یازی؛
شاعیرلری نقّال ائدیب، آواره قویاندیر،
بو مطلب عیاندیر.
اول باشی کسیلمیش قلمین توتما بئلیندن،
خؤوف ائیله دیلیندن؛
آخیردا چالار جانینی، بیر افعی ایلاندیر،
افعیسه چالاندیر؛
کاغذ سنه آغ گؤستریر اؤز سینهیی-صافین،
گوش ائیلهمه لافین؛
چوخ تئز قارالار قلبی، مۆربّیسی یاماندیر،
بیر خؽرداجا یان دور.
اول ظاهیری سۆرخون اۆرگی قاره قارانداش،
میرزالره یولداش،
قلبینده خفی سیرّینی بیلدیکجه یازاندیر،
عیّاری-زماندیر.
دئرلر اوخوموشلار: اوخوماق یاخشیدیر، امّا
وار بوندا مۆعمّا...
یاخشی نظر ائتدیکجه سرانجامی یاماندیر،
هر آددیمی قاندیر؛
لاغلاغی! آماندیر،
قؽزدیرمالی! یان دور،
سؽرتیق! موزالان! دور!
هوپ هوپ دیله دۆشدو،
اؽش مۆشکوله دۆشدو،
چۆنکی بئله دۆشدو،
اؽندی بالاباندیر...
اؽلک دفعه «مولّا نصرالدّین» ژورنالیندا (۱۸ آوقوست، ۱۹۰۶، № ۲۰) «(م.م.)» ایمضاسی ایله چاپ اولونموشدور. بو شئعر فۆضولینین «لئیلی و مجنون» پوئماسینداکی غزللریندن بیرینه نظیرهدیر. همین غزل بئله باشلانیر:
«جان وئرمه غمی-عشقه کی، عشق آفتی-جاندیر،
عشق آفتی-جان اولدوغو مشهوری-جاهاندیر!»