نظری-خلقده پاک اول

جهد ائیله، سن آنجاق نظری-خلقده پاک اول،
مخلوقو ایناندیر؛

خاصیّتین اود اولسا دا، اطوارده خاک اول،
سؤک عالمی، یاندیر؛

خلقین نظرین جلب ائله قورشاغه، قبایه،
مجلوبی-عۆیون اول؛

هر حیله و بیجلیکده گیر، البته، عبایه،
اؽمانه سۆتون اول؛

سعی ائیله کی، ساققال اوزانیب اۆچ چرک اولسون،
پاپاق اونا نیسبت؛

قورشاق دا، بیلیرسن کی، اون آرشین گرک اولسون،
تفصیله نه حاجت...

قویما یئره تسبیحی‌نی، ال چکمه دوعادن،
اؤوراد اوخو دایم؛

مجلیسده چکیب دوت اؤزونو، اول نۆجبادن،
سؤز سؤیله مۆلاییم؛

اؽشته گئیینیب مذهبی، ایمانی بۆروندون،
پک مؤحترم اولدون؛

اؽندی نظری-خلقده سن پاک گؤروندون،
اهلی-کرم اولدون؛

باشدان-آیاغا امن و امان اولدو وۆجودون،
زؤهد ایله بیتیشدین؛

نولماق دیله‌ییردینسه، همان اولدو وۆجودون،
مقصوده یئتیشدین!

وقت اولدو کی، ایمدی ائده‌سن عالمی تالان،
دوت، قویما قاچانی!

حؤکم ایمدی سنیندیر، دخی چک ایشلره سامان،
یؽغ مۆشکول آچانی؛

دول عؤورته بیداد ائله، ایتامه خیانت،
خووف ائتمه اجلدن؛

مکر ایسه اؤزون قؽل، اوخو شئیطانه ده لعنت!
شاد اول بو عملدن،
ال چکمه حیَلدن،
تزویر و دغلدن،
اؽمانی دا وئرسن،
وئرمه پولو الدن!..


اؽلک دفعه «مولّا نصرالدّین» ژورنالیندا (21 ایول، ۱۹۰۶، № 16) «هوپ-هوپ» ایمضاسی ایله چاپ اولونموشدور.