اولمایان یئرده

دانیشماز بۆلبول-شئیدا گۆلوستان اولمایان یئرده،
کؤنول شاد اولماز هرگیز باغ و بوستان اولمایان یئرده.

گؤزوم باده، سیریشکیم مئی، مزه‌م غم-غۆصّه، ای ساقی،
شرابی نئیلرم من، تازه جانان اولمایان یئرده!

یاخاسین یؽرتمایایدی، وورمایایدی باشینا سیللی،
نئدئیدی پس بو میلّت، علم-عیرفان اولمایان یئرده؟

دئییرسن، ساقیا، حاجی گۆلور پاریس شهرینده،
مگر آغلار بنی‌آدم مۆسلمان اولمایان یئرده؟

فیرنگی دیلبر الده باده هردم سؤیلر: ای عاشیق،
نئجه زیست ائیله‌سیز سیز خوبرویان اولمایان یئرده؟

الیندن ایچمه‌سین باده، لبیندن آلماسین بوسه،
مۆقدس نئیله‌سین پس، حور و قؽلمان اولمایان یئرده؟

ملامت ائتمه، واعیظ، آغلارام قؽرخ ایلدیر ایراندا،
نولور بئش گۆن ده گۆلسم آه و افغان اولمایان یئرده؟

دۆنن بو میصرعی بۆلبول اوخوردو صحن-گۆلشنده:
"چتیندیر دین و ایمان ساخلاماق نان اولمایان یئرده".

نه رۆشوت‌خوار و نه ساریق، نه واعیظ خاک-مغریبده؛
تاپیلار بؤیله ملعونلار دبیستان اولمایان یئرده.

دئدیم: گل بیر گئدک، واعیظ، کلیسایه! دئدی: حاشا،
عیبادت ائتمرم من چای و قلیان اولمایان یئرده!

خیال-خام-جنّتله کؤنول خوش ائتمه، ای زاهید،
گؤیرمز لاله و گۆل برف و باران اولمایان یئرده.

نه چای ایله قؽزار جانین، نه کونیاک ایله، ای معجز!
دوغایدی کاش سنی آنان زیمیستان اولمایان یئرده.