مکتوبون انتظاریندا

مکتوبون انتظاریندا
مثنوی

محبت باغی نین سرو روانی،
ملاحت باغی نین تازه فیدانی،
اوجابوی لولار ایچره فخر دؤوران،
شکسته قلبلره مونس و درمان،
زامانین ان سئچیلمیش نوجوانی،
گؤزللرین گؤزه لی، مهربانی،
شفقده، مهریده گؤی لرده بیر آی،
وفاده، عهدیده یوخدور سنه تای.
خوش اندامسان، خوش ایقبال، خوش عمل سن،
زمانه گؤرمه‌میش نازلی گؤزلسن.
ایلاهی، سن اوزاق ائت بدنظردن،
یانیندا بدنظر دوشسون کسردن،
سنی الله گؤروم کی، حیفظ قیلسین،
کؤنول آینان همیشه آیدین اولسون،
کامینجا گردشه گلسین بو دؤوران،
سنه ساغلیق دیلر قلب اول خدادان.

٩٢
دئییرم، دوست آیاغینا دَیَن داش،
اونا یوخ، سینه مه دیسین منیم کاش،
ابدی عؤمور قیل سن بو جاهاندا،
حیاتیم اولماسین سنسیز بیر آن دا.
او تازه غنچه تک عطرین وار اولسون.
باشیندا دایما سودالار اولسون.
محبت شرطی نین اتمامی یئتدی،
بیزیم عرض حالین ایامی چاتدی.
بیزه غافل اولوبسان، بو نه دن دیر؟
جوره ماییل اولوبسان، بو نه دن دیر؟
فراغیندا گؤزوم قانلا دولوبدور،
بیری قولزوم، بیری جیحون اولوبدور.
بوتون کیرپیک لرین خنجر سایاغی،
تؤکر قلبیم قانین اوزوم آشاغی.
دؤوروم دجله اولوب گؤزوم یاشیندان،
اوتورموش قان ایچینده مین-مین انسان.
اورک گؤی لر کیمی افغانا گلجک،
گؤزومدن یاش آخار گورشاد یاغیش تک.
منیم گؤز یاشلاریم، همت ائدین سیز،
یارین مسکنینه آخیب گئدین سیز.
آیاغینا دوشوب نازلی نگارین،
یئتیرین عرضینی بو بیقرارین.
اورییم پارچالانمیش غم الیندن،
مگر زلفو اسیر صبحون یئلیندن؟
هاردان بیر غافله گلسه، قرارسیز،
سوروننم من، سوروننم اختیارسیز.

٩٣
بو خسته قلبیمین آهی، نواسی،
اولار اول غافله نین زنگ صداسی.
آرایار، وارمی یارین بیر نشانی،
آرایار اول یئنی یئتمه جوانی.
نه امید، نه جاواب تاپماز سوالی،
سواللار دفع قیلماز بو ملالی.
نییه دیده م دولار حسرت یاشییلا؟
ایلاهی، کیمسه نی سالما بو حالا!
هارای، ای چرخ، الیندن، نه ائدرسن؟!
بو کؤنلومو هر آن دردله دیدرسن.
منه مین دردی وئردین، یوخدو درمان؛
بیر آنلیق وصل اوچون بو قدری هجران؟
نئچه مین سینه یه داغلار چکیبسن،
اوسانمازسان مگر بو جوری دن سن؟
نه اولاردی، محبت اولمایایدی!
اولوردو کاش بو محنت اولمایایدی!
اوزونو گؤرمه یه یوخ الده امکان،
نه ده گول درمه‌دیم وصلین باغیندان.
نه بیر کس وار کی، هم اسراریم اولسون،
نه بیر کس وار منیم غمخواریم اولسون.
کیمه دئییم ایلاهی، وصف حالیم؟
کیمه دئییم بو دردیم، بو ملالیم؟
بو اسرارا ایلاهی، کیمدی مرهم؟
دئ کیمده وار بو قدری دردیله غم.
کی، اونا سؤیله ییم دردیمی بیر دم؟
آلیم اوندان بو درده بلکه ملهم.

٩۴
ای عنبر قوخولو صبحون کوله یی،
خبر گتیر، سئوین دیر بو اوریی.
سن ای، عاشیق لرین دردینه محرم،
محنتکئش انسانا ان یاخشی همدم،
توتولسا غنچه تک بیر قلب کدردن،
سن اونو گول کیمی خندان ائدرسن.
نه اولار کی، اولوب محرم اسرار،
بیزیم ده دردیمیزدن اول خبردار.
دانیشیم من یاریمین فرقتیندن،
خبر وئریم جفا و-محنتیندن.
منیم بو حالیما رحم ائیله‌ییب سن،
توکنمز دردیمه امداد ائده سن.
گئدیب سن یانینا اول ظلمکارین،
یئتیر پیمانینی عاشیق زارین.
اونون وصالینا یئتن زاماندا،
تلسمه حالیمی شرح و بویاندا.
آماندیر، خاطرینه دَیمه بیردن،
بلکه ده رمزی وار، گیزلینده سندن.
اوّلجه باشینا دولان اونون سن،
منیم عوضیمده اؤپ گؤزلریندن.
یئتیر بو عرضیمی قلب اولایانا،
کدرلی قلبلره ملهم قویانا.
دمادم، لحظه-لحظه، سن مدام دئ،
اونا مندن دعا سؤیله، سلام دئ.
اگر لطف ائیله‌ییب حالیم سورارسا،
بو ادبار اولموش اقبالیم سورارسا،

٩۵
نه گئجم وار، نه ده بیر گوندوزوم وار،
نه بیر عیش گؤرمه یه یوخ منده کردار.
قراریم اول شکر گفتاریم ایدی،
مداریم اول گؤزل رفتاریم ایدی.
او سؤزلردن اورک دن درد قالمیش،
او رفتاردان منی طوفانلار آلمیش،
اورکده غم، بو جانیمدا سویوق تر،
حیات باغچامدا دا اسیر کولک لر.
هارای، منیم باهار فصلیم نه سولدو؟
حیات چشمیم داها گؤرونمز اولدو.
اینان، سنسیز ائله یاننام، یاخیللام،
منیم تک گؤرمه‌میش تشنه بو ایام.
اگر سئودان باشیمدا قالسا بؤیله،
امیدیم یوخدو وصله هئچ سنینله.
دؤنوب بختیم، گئجه م بیل، گوندوز اولماز،
سحر دوغسا غمیمدن هئچ نه قالماز.
کیمین خوش بختی وار گولسون، سئوینسین،
اونا طالع یار اولموش، قوی اؤیونسون.
قارابختین حالین هاردان بیلر او؟
سیتمدن، هجردن بیلمز خبر او.
گونش جماللیدا رحم اولسا هرگاه،
گونشه حسرتله من چکمرم آه.
آخی، سندن اوزاقدی بو کدر-غم،
اورک داردا، جیر قان، گؤزلریم نم.
کؤنول دویموش اینان کی، غم-کدردن،
قاچارام وحشی تک، جنس بشردن.

٩۶
ائله بیل مجنونام سئودای لیلی،
اورکده صحرایه آرتیردی میل.
گؤروندو بیر قاصد، یوخ-یوخ او جاندی،
بو خسته قلبیمه روح رواندی.
منی شاد ائیله دی، او وئردی نامه،
نه نامه، عطریده مثلی-شمامه.
دولونجا داغ وصحرا میشک ایله من –
دئدیم آهو گؤبیی گلدی چیندن.
باشیمدان عقلیمی آلدی بیر آندا،
دییشدی حالیمی بو خسته جاندا.
آچارکن نامه نی گئتدی کدر، غم،
کرامت قاپی سی آچیلدی اول دم.
بو نامه دیلروبا، او یاردان ایدی،
او مونس سئوگیلیم دیلداردان ایدی.
گاه اؤپدوم، گاه دا قلبیم اوسته قویدوم،
منه سئوینج گتیرمیشیدی، دویدوم.
فقط بیردن حالیم اولدو پریشان،
او خطه باخماغیم دئییلدی آسان.
تعجب ائیله ییردیم اقبالیمدان،
منه نامه گلیب میشکین خالیمدان.
باخاندا نامه یه حالیم دورولدو،
اورک ده نامه نین عطریله دولدو.
ایلاهی، بو نئجه خوش ساعت ایدی؟
بو کی، بیر عوض سیز سعادت ایدی.
مگر بو دورانین رأیی دولاندی،
یاتان بختیم مگر، بیردن اویاندی؟

٩٧
نه اولدو جور چرخ، اول ظلم دوران؟
او ظلموندن مگر اولدو پشیمان؟
اوخودوم نامه سین گول اوزلو یارین،
ایشیندن حالی اولدوم اول نگارین.
او نامه چوخ شفققتله یازیلمیش،
نئجه لطف و محبتله یازیلمیش.
یازیب: «ای هجرانین بندینده دوستاق،
هجرانا صبرایله دؤزرلر آنجاق.
قوی، اوزون دؤنمه سین جور فراقدان،
هجریمده ال اوزمه سن اشتیاقدان.
هله اسکیلمه‌میش مهرین یانیمدا،
سئودان باشیمدا دیر، ذوقون جانیمدا.
سنی اونوتمارام، فکریم بو اولموش،
نه واخت اوللام او یاریملا هم آغوش.
بوتون عشق اهلینه بو بیر مرام دیر،
نامیدلیک معشوقلارا حرام دیر…»
گل ای ساقی، گتیر بیر جام گولگون،
اورکده پاس توتان دردیمی سیلسین.
شوکور اولسون کی، بختیم ده یار اولدو،
نه خوش ایام، نه خوش روزگار اولدو!
گل ای واضح، مجاز عشقی دن سن
حقیقت تاپ، اونونلا یوکسه لرسن.