اؤز گمانیمدا بودور: من عاقل و فرزانه یم

ای کؤنول، سن گل بو یار بیوفادان ال گؤتور،
قوی سنی بو درد اؤلدورسون، دوادن ال گؤتور!
یار-یولداشدان امید اوز، قوم-قارداش ایستمه،
یومگیلن بیگانه دن گؤز، آشنادن ال گؤتور!
اوخشادین گول اوزلری، اؤیدون بو قاره گؤزلری،
حاصلی نولدو؟ هوس بسدیر، هاوادان ال گؤتور!
فتنه دیر عشق مجازی، فتنه دن قورخماق گرک،
عشق نفسانی خطادیر، بو خطادان ال گؤتور!
ای منی گؤزدن سالان مهر و وفاسیز سئودیگیم،
گر یوخون مهر و وفا، باری جفادان ال گؤتور!
وعده وئرمیشدین نئجولدو؟ عهد قیلمیشدین هانی؟
کیم دئدی، سن عهدینی سیندیر، وفادان ال گؤتور؟
زاهد بیچاره، بسدیر بیر بئله قیلدین ناماز،
صبحه و سجاده نی ییغ، بو ریادان ال گؤتور!
بیر بئله، ای خواجه، ییغدین مال دنیا، دویمادین؟
تا نه واختا هیرس؟ بو فانی سرادن ال گؤتور!
تاجر بدنفس، خوش ظاهیر، پئیمبردن اوتان،
بسدیر، ای نامرد، تنزیل و ریبادان ال گؤتور!
ای داداش، کئچدی جاوانلیق موسم سورو سورور،
ییغ بساط عشرتی، سئیر و صفادان ال گؤتور!
تا بیلیرسن، عقله قوللوق ائیله، نفسین بورنون اوو،
دوش پری لر آردینا، دیو دغادن ال گؤتور!
اؤز گمانیمدا بودور: من عاقل و فرزانه یم،
لاف وورما، هیدجی، بو ادعادن ال گؤتور!