شهابالدّین بگین ایقبال و بختی مۆستدام اولسون
شهابالدّین بگین ایقبال و بختی مۆستدام اولسون،
آنی حیفظ ائیلهین دایم خودای-لاینام اولسون.
گۆلوستان-صفاده قؤنچهی-اۆمّیدی آچیلسین،
وۆجودی دهر باغیندا همیشه خوشخورام اولسون.
جاهانین عۆمده عئیش و عیشرتی چۆن وصل-دیلبردیر،
الینده بیر سمنروخسار زۆلفو صبح و شام اولسون.
ایگیتلرده گرکدیر یاخشی آد عالمده سؤیلنسین،
حیاتی باقیدیر اول کیمسهنین کی، نیکنام اولسون.
بیزه سندن هدیّه، نور-چشمیم، بیر محبّتدیر،
سنه واقیفدن اما چوخ دوعا ایله سلام اولسون!