آچیق‌باشدا اگر اولسا بیر دیلبر

آچیق‌باشدا اگر اولسا بیر دیلبر،
اوندا بو نیشانلار مۆعیّن گرک.
اندامی آیینه، قدّی مؤعتدیل،
سیاه زۆلفو قامتینه تن گرک.

یاناغی لاله‌ی-باهاری کیمی،
لبلری یاقوتون کناری کیمی،
بیر دانه ناسوفته میرواری کیمی،
باشدان آیاغادک آغ‌بدن گرک.

تمیزلیکده اولا مئیل و هوسی،
اولمایا عاشیقه ناز و غمزه‌سی،
گۆل تکی قوخویا نیطق و نفسی،
زۆلفو یا بنفشه، یا سمن گرک.

ال-آیاغی قاعیده‌ده، دیستوردا،
ساقی فربئه، توپوقلاری چوخوردا،
بیر قات ات ایچینده، سۆموگو خؽردا،
آغزی-بورنو نازیک، اۆزو گئن گرک.

نؤورسیده، اون دؤرد، اون بئش یاشیندا
عئیب اولمایا کیرپیگینده، قاشیندا،
حیاسی اۆزونده، عقلی باشیندا،
قوللوقدا، صؤحبتده مۆستحسن گرک.

طووس کیمی جیلوه‌لنه هر سحر،
بزک وئره جامالینا سربه‌سر،
دیندیرمه‌میش وئره کؤنولدن خبر،
ایشاره آنلاییب حال بیلن گرک.

یاشادیقجا جاوانلانا، ائنلنه،
بیر حیجابدا، بیر پرده‌ده اَیلنه،
نیطق و نفسیندن جانلار دینلنه،
شیرین دانیشیبان خوش گۆلن گرک.

قؤولی صادق اولا، هر فعلی حلال،
بیلمه‌یه کیم، فیتنه نه‌دیر، مکر و آل،
شامع کیمی قاباقدا دورا نیطقی لال،
کسیلسه ده باشی، دینمه‌ین گرک.

واقیف، یاخشی جانان گرک جان اۆچون،
نه‌دیر چوخ چالیشماق بو جاهان اۆچون،
بیر گؤزل لازیمدیر بیزیم خان اۆچون،
والی قوللوغوندا عرض ائدن گرک.