خئیلی واختدیر آیریلمیشیق یار ایلن
خئیلی واختدیر آیریلمیشیق یار ایلن،
گؤردوک، اما تانیشمادیق، آیریلدیق،
قالدی جاندا گیزلی-گیزلی دردیمیز،
بیرجه کلمه دانیشمادیق، آیریلدیق!
غریب-غریب دوردوق بیگانهلر تک،
سویوق-سویوق باخدیق دیوانهلر تک.
دؤنمهدیک باشینا پروانهلر تک،
عشق اودونا یانیشمادیق، آیریلدیق!
یاریم ساعت بیر آرادا قالمادیق،
عشق آتشین جانیمیزا سالمادیق.
یالواریبان یارین کؤنلون آلمادیق،
ائله گئتدی، باریشمادیق، آیریلدیق!
او زامان کی، آشنالیغی ترک ائتدیک،
جۆدا دۆشدوک، خئیلی جیگر برکیتدیک،
آرالیقدان کؤنول قوشون اۆرکوتدوک،
بیر-بیریله قونوشمادیق آیریلدیق!
واقیف سئودی بیر ایقرارسیز بیوفا،
بادا گئتدی تامام چکدیگی جفا،
گؤروشوبن ائیلهمهدیک خوش صفا،
قوجاقلاشیب، ساریشمادیق آیریلدیق!