سنسن، ای نازنین، گؤزللر شاهی
سنسن، ای نازنین، گؤزللر شاهی،
اولا بیلمز کیمسه برابر سنه.
سرخوش دوروب ساللاناندا هر یانا،
مات قالیر، ای سرو، صنوبر سنه.
باخدیقجا باخیشین شیرین، گؤزون شوخ،
بیر عجب جاوانسان نزاکتین چوخ،
کمالیندا، جامالیندا عیب یوخ،
پروردیگار وئرمیش هر هۆنر سنه.
سؤز یوخ زنخدانا، زۆلفه، یاناغا،
قامته، گردنه، قاشا، قاباغا،
بیر شیرین دیلبرسن باشدان آیاغا،
نه نابات بنزهییر، نه شکر سنه.
یا بدرلنمیش بیر ماه-تابانسان،
یا جنّت باغیندا گۆل-خندانسان،
یا ملکسن، یا دا حوری غؽلمانسان
ای سئودیگیم، اینسان کیم دئیر سنه؟
چوخلار گئتدی ایلتیماسا، گلمهدین،
اۆزوم اۆسته قدم باسا گلمهدین،
واقیف اؤلدو، نئچون یاسا گلمهدین؟
یا ظاهیر اولمادی بو خبر سنه؟