منو
مظفرالدین جهان شاه - حقیقی
٩-جو هیجری و ۱۵-جی میلادی یوز ایلده ایراندا قاراقویونلو سلطنتی‌نین قوروجوسو اولان و شعرلرینده حقیقی تخلصونو ایشلدن ابوالمظفر جهانشاه گؤرکملی شاعیرلریمیزدن اولموشدور. تیموری‌لرین رسمی تاریخچیسی و جهانشاهین چاغداشی عبدالرزاق سمرقندی یازدیغی «مطلع السعدین» اثرینده اونون حقینده بئله یازیر: «جهانشاهین یاخشی ایداره‌سی اوزوندن آذربایجان چوخ مورفّه بیر وضعیتده‌ایدی. عدالتی ایجرا ائتمک مملکتین آبادلیغینی تأمین ائتمک و تبعه‌سینه مهربانلیقلا رفتار ائتمک بو پادشاهین اساس قایغیسی ایدی، حؤکومت مرکزی اولان تبریز جمعیتی و امنیتی ایله میصرله رقابت ائدیردی.»
جهانشاه ۷۰ ایل یاشاییب و ۳۳ ایل پادیشاهلیق ائتمیشدیر. بو گون تبریزده گؤی مسجد آدیله مشهور اولان آبیده اونون و خاتونو بگومون اثریدیر و جهانشاهین قبری ده اورادادیر.
جهانشاه ایکی دیلده فارسجا و تورکجه شعر یازمیشدیر. شعرلری‌نین ایکی الیازماسی واردیر. بیری بریتانیا موزه‌سینده(نمره ۹۴۹۳)ساخلانیر. بو مجموعه ۸۵ ورق دیر ایلک بؤبومونده ۱۰۵ فارسجا غزل و بیر مستزادی واردیر. ایکینجی بؤلومو ده ۸۷ تورکجه غزل و ۳۲ تورکجه روباعی‌دن عبارتدیر. ایكینجیسی ایروان الیازمالاری انستیتوسوندا ساخلانیلیر.